SOMAZ BODOLTA - Lucian Dias
Zoso somaz bodolta, toxem jivit amchem danvta,
Sumurt sangta bhavartan magxi, magnnem Devak pauta
Kitleim dukh tum kadta titleim sukh laguim tuka rauta
Sudorlelea xekdeant kosso zait dorom amcho bauta.
Pritum-intlem ek foll Devak diunchem munn assa sumurtin
Bedh-bau nastanam tum bavart passun gheye mottint
Dogh put assot maim, paik, ekak padri zaunk daddi ottin
Osle maim, paik zaunk burgim hea fuddem mellonk zobor kottin.
Jivit vachit adleam Padrichem dukham bhortat dolleant,
Raiturche te Seminarint sallkam fulleant diso tolleant
Ghor-dar Maim, Paik soddun Padri zaunk, sankleo galit golleant,
Seminar aiz to orounom dista kolle nam zaun molleant.
Devache muniari zaunk bhurge Seminarint astale,
Thodeank khaki nesop, thode tantle dovo lobe nestale,
Sanjchem xitoll varem gheunk dongrar zomeanim bostale,
Vattsureanchi thuim nodor poddlear, te parve xe distale.
Voddil sangtat adleam Padrink khuim chodd mann zaie favo,
Padri khoro, gonvdi diso munn galtoch to lobe kallo,
Rosteavoilean ek pulis ailear, lok lipon kuxin danvo,
Punn ek Padrik poitoch mansugen lhan-vodd ube ravo.
Nodor marlear amchea dhormancher tor motveo zatat valli
Apnem kumsar Devak sangonk zata, muntat aicheo chali
Adle padri martir melet, atam sumurt mudar zali,
Somaz bodola, padri unnem zaun Seminari zatat khali.
