Born: 19th sept 1925 : Died 22nd March 2012
Real Name: Remedious J. Colaco
Stage Name: Remmie Colaco
ANKWAR MORIECHEM DUKH – Remmie Colaco
Sonvsarant patki ami torui axetam bhogunk sukh,
Sonxi nezo konnaichean matui pottak hea laglear bhuk
Zo konn bhonvta hea sonvsarant, fatt korun Devak te adarta vhodli chukh
Kiteak upkarta sounvsar, chintlear Ankvar Moriechem dukh
Putak tichea marit vhelo dongrar tea judevanim
Tachea fatlean aponn bonvli roddon dukhamanim
Kitem bhoglem nam zait pollun putak toplolo tea baleanim
Sangat oslem dukh sonvsarant bhoglam khoimchea Maiamanim.
Kosoli chukh nastanam Jesuk kelo guneavkari,
Fassfoli kudd tachi marun rogtamcheo keleo zori,
Sangat konn avoi sonxit dolleam mukar aple puta oslem korit tori,
Punn hem soglem dukh sonsun ravli eklich Ankwar Morie.
Jesuchea khandar khuris diun voddit velo topun balle,
Udok passun pieonk diunk nam kosle volvole,
Jezuchim angostram pinzun Judevani bognar kele,
Osle munis azun assat dhonia ugodd tanche dolle.
Konnak lagon maim hem sonslem ani goddoilim dukham,
Kiteak Jesu khursar melo sangxi goroz nam tumkam,
Munis visorole Devak bulon hea sonvsarant chodd zalim munxeachim patkam,
Dekun Jesu khursar melo salvar korunk amkam.
Tea pasot aikat kaido amchea sogllea kristavamcho,
Sonvsaran asso sor mog korunk Igorj matecho
Jesucho mog korun cholom-ia rosto bhavartacho
Anik gheum-ya vantto Saibinniche dukhicho.
BAGINTLEM FUL - by Remie Colaco and Mohana
Aikat cheddum cheddeachi sangatin,
Cheddva vinn sonvsar ho cholonk kottin,
Bhoinni utram aikon dhor tum motin,
Fuddar tuzo assa tujeach hathin.
Ch: Flory tum bagintlem ful,
Chedde poitoch tuka zatat gul,
Dolle tuje azul,
Bhoinni cheddeanchea gunnank tum bul ....x2
Cheddum cheddeak poitoch doddta-moddta
Bhulon rupak chedde mogan poddta
Cheddvank poitoch cheddeancho jeth choddta
Sangonk loz dista, amkaim tench ghoddtta.
Ch: Khor mogacho uzo,
Cheddea-cheddvamchean ravonk nezo,
Mogak addai nezo,
Tache vinn sonvsar ho cholonozo...x2
Flory aikon monan dhor tum thoddem,
Khorench sobit dista tumchem zoddem,
Sintidan rav pavtam pavsa fuddem,
Sambav bhuddot mogachem voddem.
Ch: Cheddeank fottoinakai,
Khoxi nam tor jurament dhiunakai,
Duddvank bhulonakai,
Soglleam cheddvanchem nanv uboinakai...x2
BHAV-BHAV - Remmie Colaco N Alfred Rose
Bhav-Bhav ami dogui mogan bonvtanv
Vhoddilamchea utrar ami choltanv
Maim-pai bhoinn soglim ekvottan rautanv,
Amchea vhoddilank man ditanv.
Gorib ami sangonk lozonanv sobemazar,
Duddu nam punn borem ginean kortanv ami uzar,
Amchi bhoinn ankvar urta doth nam zaun ozar,
Punn ami ekvottan ravon bhoinnik korteleanv kazar.
Sonvsarant duddu vhoddponn soglem fott,
Fokot ekuch monan dhorunk zai ghott,
Morosor boro zaunk amcho xevott,
Bhava modem asonk zai ekvott,
Thodde bhav eka-mekak dinant aplo adar,
Vhodd zatoch ekuch rogot punn zatat mudar,
Bhavak visron ath galun bonvtat amiganchea khandar,
Ami oxem korun pirdear korchenanm amcho fuddar.
Gharant sodanch suseg assonk boro,
Dusmankai korunk zai ami poro,
Maim-paik bhavam bhoinnak kelear aro,
Tednach ekovott asta khoro.
Dekun bhava sodanch tum ekvottan rau,
Girest zalear gorib bhavakui tum pau,
Gharant zogddim mhunntat assot tor zau-zau,
Punn bailamchem kainch cholonam mogan cholot tor bhav bhav.
GHORACHEM SUKH - Remmie Colaco
Amkam zonn-ekleak ek ghor assa sothechem,
Voi hem ghor amchem bhiradd familichem,
Hea gharant ravon jivit sartanv amchem,
Ghor sothechem amkam sogleank sukhachem.
Gharan ektaim bhav-bhoinnim,
Maim-paiche vengent jieleanv lahnponnim,
Koixtt kaddun amkam voir kaddle tanim,
Amchem bhurgeaponn sukhan sarlem ami.
Ami mog visronk favonam maim-paicho,
Tanche udexim sonvsaran zolm amcho,
Zorui gharant ekovtt aslear familicho,
Kednam duspott zaunk pavonam ghoracho.
Zaite pautt oxem ghoddta,
Maim-pai mortoch bhav-bhav bhensak zogoddta,
Zaitea tempacho the to ekvott toddta,
Kai borem gharachem sukh te vibaddta.
Ekach gharan bhav-bhav mogan jiele,
Ekech avoichem dudh soglle piele,
Kazar zatoch khaxea rogtak visorle,
Gharache vantte korunk kortini paule
Ekuch rogot bhavanchem,
Maim-paichem bhens vantunk kortin kiteak vechem?,
Soglleani boreaponan vantun gheuchem,
Kai borem gharachem sukh tem sambauchem.
GHARANT GHE NAKA - LC = Lourdes Colaco RC=Remmie Colaco
LC: Anv vochonam ghovaxim, bhava tuje poddtam anv paiem,
Puro ghovachea gharant, zaitem dukh bhoglam tem anvem,
RC:Polle Elvir gharabeachem nanv tunvem samballunk zaiem,
Tum kitem sang maka tujea ghovaxim vechem poddtelem tunvem.
LC: Mojea gharan anv raulear sang kitem zata tuka,
Maka papan rav mhunntlam anv bieomchim nam aka,
RC: Papachem kaim antam cholonam soglo diret assa maka,
Tuzo ghov astannam maka tum hea mojea gharant naka .
LC: Moronk maka daddtai, ghovaxim anv vochonam thoimsor,
Hea gharan mojean ravom ieta, kitem zalem kazar zalem tor,
RC: Kazar zatoch tuka fokot ghovachench ghor ugddass dor
Tem ghor tujean soddi nezo kounchechem kakkon athin assot sor,
LC: Ghovager respet maka nam, kamam kortam sogllemchem,
Voilean ghov maka uloita, sang anv sonsum konnachem,
RC: Ghovache gharacho vavr korunk, kam heam boream bailanchem,
Toxench aik ghovacho maim-pai aslear tum sirvidor tanchem.
LC; Ghovaxim vellem baxek khuimchorui vochon jiu ditam anv
Tum bhav zaun mozo, bhair ghaltai maka chodd borem tujem zanv,
RC: Polle bhoinnim jiv dilear tunvem hanstolo amkam ganv,
Anv bhav mhunn sozmotai tor aikon mojem raktelem amchem nanv.
LC: Maka gharantle bhair ghaltai borem tujem zanv naka,
Zorui anv melear passun moddear mojea eunaka
RC: Tuka bhair ghatlam mhunn osle xirap diunaka
Aikat bhavanim oslea bhoinnak tumi gharant ghe naka.
GOEMKAR - Remmie Colaco
Ami Goemkar uxear mhunn amkam sonvsar vakandta,
Amchem ganvchem nanv ghetoch bhailo lok chodd sontosta,
Ami Goemkar fidalg mhunn amchi voddvik uloita,
Amchem fidalgpnn polloun amkam bailo lok fottoita,
Margao Ponnje Mhapsa Vasku ganvani,
Biznessachem markit assat bhavani,
Tachi podh gheunk chintlam keralkarani,
Aiz Vasku cho markit sampddailo tanni.
Amchem kitem zait konn zana, ami fuddar chintina,
Duddu amche lagim ason ami business korina,
Amkam serkar loan dita thovui ami kaddina,
Ami biznessak vavrona dekun voir ami sorona,
Ami BA Bcom xinkon zale vhoddle,
Punn teknikal kors korunk visorle,
Dekun bhaile enginer antam Goeam pavle,
Ani nizache Goemkar bekar urle/poddle.
Ami Goemkar mhunnonk nanv punn ganvchem chintinanv,
Focot politics kortanv jedna asta tedna elissanv,
Nodor marun poina koso cholta tho amcho ganv,
Hindu tori xanni punn nhoim ami Christanv
Ek dis marekar temp tho yetolo,
Niz Goemkarancho pavor denvtolo,
Bhailo lok Goa ganv aplo mhunntolo,
Goemcho chif ministr keralite zatolo,
Tedna mojea utramcho ugdass yetolo,
JEZU – by Remmie Colaco
Sonvsar ho don disancho
Soglleanim hanson-khellon vell sarpacho
Sonvsaran konn urta ani kednam konn morta
Konnanchean parkum nezo
Ho ugddas monan dorcho
Peleacho mog kor mhunntta dhorom amcho
Goribank adar dilear, konnamcher upkar kelear
Foll mevta upkaracho
Ch: Aslet khuim dog zann sezari punn dogaim modem boro ekvott naslolo
Eklo sezari boro munis bhagivont Devachea mogan lastalo
Dusro aslo to vhoddlo patki ani bebdo konnank vollko naslolo
Rat ani dis soro pion zogddim korun sezareank sotaitalo
He khobrek zaito temp zalo
Hem ghoddlem jednam Jezu sonvsaran ailolo
Tednam ho bhavigont munis Jezuchem utor aikonk
Jezu pattlean bonvtalo
Ek dis to Jezuk mevlo
Apnnanger jevnnank ieo mhunn konvit dilo
Jezun taka utor divn, panch-sov Apostlank ghevn
Ek dis tanger jevnnank gelo
Ch: Jezu ani Apostl apnnanger ietat te pollovn ho munis gaborta
Tannem fokot Jezuk apoilolo punn Jezu Apostlankui ghevn ieta
Torui punn ghoddta te baxen jevn-khavn dhadoxi korun tankam daddta
Bebdeak hi nossai zata, ragan sezareachi izzot kaddta
Thoddoch temp passar zalo
Boro sezari babddo duent poddlo
Disandis duens vaddon, kallzacho atak ghoddon
Sonvsar to soddun gelo
Bebdo chodd khoxen bhorlo
Sezari melo mhunn boroch pielo
Pion upaxim nidon, nidla thuim thonddi choddon
Tovui teach disa melo
Ch: Mortuch dogaimchei othme patkanchi zoddi divnk San Pedruxim veta
Bhagivontak tagdden ghaltoch patkam taka nam zavn tagddi voiruch urta
Patkeak tagdden ghaltoch patkanchem vozon chodd zavn tagddi sokla devnta
Sam Pedro taka Porgotorin dhaddta ani bhagivontak sorgar voch mhunntta
Patki sezari roddta
Bhagivont sezari taka churchurta
Tannem vaitt kel'lem visorta, taka sorgar voronk chinta
Tednam thuim Jezu pavta
Bhagivont Jezuxim veta
Sezareak aplea sorgar dhadd mhunn magta
Jezu toxem zainam mhunntta, sezari sintid zata
Ani Jezuk oxem sangta
Ch: Saiba sonvsaran astannam tuka ekleakuch hanvem jevnnank apoilolo
Punn tum ietannam panch-sov Apostlank ghevn amger jevnnank ailolo
Atam hanv eklea sezareak ghevn ailam mojer upkar korunk tum visorlo
Jezuk ho ugddas ailo patkeak bhogsun taka sorgar daddlo
MAIM-SUN - Remmie Colaco
Tan ani bhuk sonsun maim putak tujea tum vaddoita,
Putachea boreponnak sogllo sonvsar portun uddoita,
Putacho mog tujea kallzan disan-dis tum choddoita,
Punn put kazar zatoch tuje sunek tum roddoita.
Koslo faido putacho mog korun kazar zatoch suseg nam tor taka,
Maim tujean sun bori bonvleli pollounk nezo, tum dolle foddtai tika,
Putak kexi sangon sunek dusman kortai tichem borem zal'lem tuka naka,
Tuje dhuvek lokachea gharant oxem kelear sang borem disot tuka.
Antanch nhoim adlea tempar passun poddonam maim sunank,
Sunecheo gozaleo ganvantuch nhoim pavtat pasun ranant,
Put mhunno konnachem aikon dadoxi korum konnak,
Hea kestanvak lagon kazar tem zodd zalam zaitea zannak.
Maim tum sorik korun putak kazar kortai torui sun tuka mandvonam,
Lokachea bhurgeak addun koslo faido zorui tujea gharant sukh mevonam,
Tuzo put ani sun mogan bonvtat zalear tunvem modem poddonk favonam,
Putacho mog korta ti avoi, sunecheo kexi putak kedinch sangonam
Maim tujea putacho fuddar sodanch zaunk zai boro,
Put kazar zatoch suseg di taka mog tuzo dakoi khoro,
Osoli sun tuka mevonk tika tum kor aro,
tuka vaitt kelear korum put ani sun mogan bonvlear puro.
Eke avoin aple sunek manun gheunk zai apli dhuv zalea porim khori,
Tednam kizilam zainam ghoran sodanch sovostkai asta bori,
Oxem korun tum maim sunek tuzo mog tum dakoit tori,
Mortoch tum, roddon tujem modem soboiteli dukhamcheo korun zori.
MOG - Remmie Colaco
Mog jinsam bhasancho mog, sonvsarant munxeak bulloita,
Tho mog avoi-bapaicho mog bhurgeamchea kallzan kirlota,
Tosoch bhav-bhoinnacho mog kitlo nirmoll tho mog sukhachea painean dholloita,
Khorem rogot mhunnon kolloita, oslo mog sukhan ghor choloita.
Punn mog, cheddea-cheddvamcho mog, akho ho sonvar alloita,
Sukhan chedde-cheddvam sukhan bhurgeam porim toh khelloita,
Oslea mogachea nadar, zatokoch magir kazar, gharacho divo palloita,
Mog thoddeank dita sukh, punn toddeamcher yeun dukh, dukham golloita...x2}
Mog tho koddu ani godd punn poilo parkunk mevonam,
Xitoll fulam porim nitoll, mogacho xevott ghavonam,
Poilech mogacho vosso, lagon tum zatai pisso, kitem korchem kaim kovonam
Mogan tujea addkol favonam, amigam borim tum bonvonam.
Punn mog, porno zatoch tho mog sukhachen painean khevonam,
Tedna cheddvan bonvonk yea mhunntlear cheddo mhunnta anv pavonam,
Magir virar zaun bezo, ragacho petton uzo, choddlolo rag denvonam,
Zata mogacho fog, poiat fottkiro mog, ektaim ravonam...x2}
Rochun Devan amkam rochun, zonn ekleache khuxen rochela khudd,
Toxim rochnnem modem amkam sogleank von poddvi dilea vhodd,
Dadle bailek mevonk sukh, pois korunk tanchem dukh Devan mog rochla kitlo godd,
Kalluk amche fuddar addxi tor, sogleam von mogchi goroz chodd.
Mog korit thor nirmoll mog, mogachi kaddi nezo khodd,
Dekun mogall moje bhoinnim mog tum kortai to zanv di ghodd,
Cheddea utor aik mojem, ghor sukan bhoronk tujem fotkirea mogachi vatt sodd,
Borem tem ful vinchun, barik fuddar chintun, sakrament zodd.
Mog nhoim boro tho fottkiro, punn mog boro kelear khorooooo!
SANKISTANV - Remmie Colaco
Ganv bhavani him utram mojim sadoitam tumchea kanar,
Sonvsarant hea assat munis zannar ani toxech nennar,
Soglle ekuch, gorib girest, xinkot tor bhurgeachponnar,
Mouza marxi, tem xinkop soddxi, tor roddtoloi matarponnar.
Utrancho heam, bhava ugddas dhor, xinknnar uxear, nennarak zaina sor,
Xinknnar ganvam passot vavurta, taka ganvcho vhoddil korit tor,
Nennarak tea, kelear kunvor, hatan tachea dilear pavor.
Somzonchem to, te razvoddkecho, jerul kortolo mhonn dunvor.
Eka ganvan, eke igorjen ekloch khuim padri aslo,
Eka Aitara to duent zalo, mis sangonk zainam tosso,
Igroz bhor lokh, mis aikonk ailolo, to babddo mis sangtolo kosso,
Dekhun Sankistavank apoun haddun tannem sanglem, ki lokak sermanv
sang mhunnon osso.
Vigar boro nam, aiz mis aschemnam tachem,
Mis aikonam tor patok nhoi tumchem,
Konnachem beg sanddlam tem Sankistin dorlam, choukoxi korun yeun vorchem,
Porvam Munglaradis, Fest Sampedr Sampaulachem
Ervam Budvaradis, kazar Ladru Mariche,
Tanchea Kazarak kitem, addkol assa zalear, vigarak yeun sangchem.
Utram aikon Padvigarachim, khuxeal zalo sankistanv,
Mhunno laglo, sankistanv aslolom, aiz thaun padri zalom mhunn anv,
Chintlem tannem, sermanv sangtoch, ojeaptolo mhunn apleak ganv,
Nettan ghelo, lokak poun bielo, ani aikat kosso sanglo sermanv.
Vigar boro nam aiz, patok nhuim tumchem,
Porvam Munglaradis, fest Ladru Marichem,
Tanchea festak kitem, addkoll aslear, Sanksitin yeun sangchem
Ervam Budvaradis, Kazar Sampedr Sampauluchem,
Vigaran sanglam tumi kazakarak yeunchem,
Kiteak eta to Berestar, mhoineacho poilo Sunkrar, sogleanim kumsar zaun
kominheanv ghenvchem.
SUDAROP - Remmie Colaco
Goemkar ami sobit ganv amcho Goa,
Vegim ganvan amchea boreponn nam Deva,
Dor ek goemkara bhava,hea molba thava,
Ganvam passot zagrut rava.
Ilem-ilem korun antam Goemchem sudarop zata,
Vepar dondo korunk meuta mhunn zaito lok danvon yeta,
konnachi zomin mevot tor bore duddu diun gheta,
Duddvank bullonakai zomin vinkinakai Goeam zolmolelea puta.
Vis vorsam fattin Goeam vag asle rannant,
Punn te vag antam poule bion minak,
Thodde Goemkar mhunno Goeam zai konnak,
Punn antam bottam ghaltat tondant.
Thodde zann Goeam naka mhunn vinkun gelele bhatam,
Thoddeani vavr poddta mhunn sovai vinklelim xetam,
sothechem assa tem vinkun zoddunk gelele notam,
Bhavani chear anneani metr, zomin asleli ti tinxim rupiyani zali antam
Sonvsarant sothek zuzta dor ek nassanv,
Punn ami ekvott nam zaun kallukan assanv,
Zorui soglleamchem amchem ek zait tensanv,
Vegim voir sortalo amcho ganv.
Antam ami dondo kelear fuddarak voir sortele,
Nam tor sodankal lokager bhasnnam ghasunk urtele,
Sothechem assa tem vinklear eka tempar roddtele,
Magir Goeam etoch gharam nam zaun bhaddeachea gharani rauchem poddtelem.
Updated 29/05/2020
